НИТХ-ын Зөвлөлийн ээлжит 13-р хуралдаан боллоо. Хуралдаанаар,
- Нийслэлийн өмчит аж ахуйн тооцоот үйлдвэрийн газруудын ашиг орлогын хуваарилалт тогтоох тухай
- “Улаанбаатар хөрөнгө оруулалт, менежмент ҮЦК” ХХК-ийн дүрэм шинэчлэн батлах тухай
- Нийслэлд хийж бүтээн байгуулалтын ажлуудын явц
- Цэвэрлэх байгууламжуудаас гарч байгаа лагийг хатаах, шатааж цэвэрлэх үйлдвэр байгуулах төслийн ТЭЗҮ
- Нийслэлийн 2025 оны төсөвт нэмэлт, өөрчлөлт оруулах тухай зэрэг 10 асуудлыг хэлэлцлээ.
Нийслэлчүүдийн тухайд, Төв цэвэрлэх байгууламжаас гарч буй лагийг байгаль орчинд аюулгүйгээр хатаах, устгах, дахин боловсруулах, хотын баруун хэсгээр үнэртдэг өмхийг арилгах асуудлыг үргэлж сөхдөг. Нийслэлд хэрэгжих 23 мега төслийн нэг Лаг хатаах, шатаах үйлдвэрийн ТЭЗҮ-ийг боловсруулж дууссан бөгөөд энэ сарын 8, 9-ний өдөр хуралдах НИТХ-ын Ээлжит IV хуралдаанд хэлэлцүүлэхээр албаныхан мэдээлэл өгч, Төлөөлөгчдөд танилцууллаа. Цэвэрлэх байгууламжуудаас гарч байгаа лагийг хатаах, шатааж цэвэрлэх үйлдвэрийг Сонгинохайрхан дүүргийн XX хорооны нутаг дэвсгэрт байгуулахаар төлөвлөжээ. Ингэхдээ лаг оруулах-Усгүйжүүлэх шат-Хатаах шат-Шатаах дамжлага-Цахилгаан, дулаан үйлдвэрлэл гэх дамжлагатай байх гэнэ.
Одоо ажиллаж буй Төв цэвэрлэх байгууламжийн тухайд, өдөрт 170,000 м³/хон ахуйн болон үйлдвэрийн урьдчилан цэвэрлэсэн бохир ус цэвэрлэх хүчин чадалтай ч өдөрт ирэх бохирдлын хэмжээ 2-3 дахин ихэссэн. Байгалийн аргаар хатаах явцад эвгүй үнэр маш их гардаг. Тоног төхөөрөмж хуучирч муудсан зэрэг асуудал бий учир энэхүү үйлдвэрийг барьж байгуулах хэрэгцээ шаардлага тулгамдсан асуудал болоод буй.
Зөвлөлийн хурлаар танилцуулсан 10 асуудлыг НИТХ-ын Ээлжит IV хуралдаанд танилцуулахыг Зөвлөлийн гишүүд дэмжлээ.
Эх сурвалж: НИТХ-ХМОНХА
