Цар тахлын халдварын тохиолдол сүүлийн өдрүүдэд зуу зуугаар нэмэгдэж буй нь нийгэмд олон маргаан дагуулж байх шиг. Ажил, амьдрал хэвийн үргэлжилж, хүн хоорондын харилцаа өрнөж байгаа л бол халдварын эрсдэл нэмэгдэх нь хэнд ч ойлгомжтой мэдээжийн зүйл л дээ. “Халдвар төдөөр нэмэгдлээ” гэх тоолонд байн байн тоо бодож хямарч, толгой хоргодох газар хайж, хэн нэгнийг автоматаар буруутгах нь хэтэрхий гэнэн хийгээд өрөөсгөл юм.
Хүссэн, хүсээгүй дэлхий нийтээрээ цар тахлын халдварын нөхцөл байдалд дасан зохицож, аюул эрсдэлээс дор бүртээ сэргийлж амьдрахад суралцах шаардлагатай болсон. Гэтэл монголчууд бид л ганцаараа үүдээ тас түгжээд, өрхөө таг бүтээн гэр гэртээ бүгээд, коронавирус дэлхийгээс нэг мөр арилахыг хүлээнэ гэвэл жинхэнэ маанаг үйлдэл тэр болно. Харин түүний оронд ямар нөхцөлд аль салбар, ямар үйл ажиллагааг хүлээн зөвшөөрөх, халдвар хамгааллын ямар дүрэм журам баримталж ажиллах гэх мэт тодорхой мэдээллээр иргэд, олон нийтийг ханган, эргээд хяналт тавих, хариуцлага тооцох асуудалд бодлого шийдлээ чиглүүлэх нь зүйтэй санагдана.
Иргэд, аж ахуйн нэгжүүдээ цар тахлын үеийн бэлэн байдалд дасан зохицож амьдрах, өөрийгөө болон өрөөлийг эрсдэлээс урьдчилан сэргийлэх байнгын дадал хэвшилд сургах нь магадгүй энэ цаг үед хийх хамгийн чухал ажил болоод байна.
Түүнээс биш халдварын тоо нэмэгдэхээс айгаад, захын хүнд баалуулж чичлүүлэхээс эмээгээд хатуу хөл хорио тогтоочихож болно л доо. Айл өрх болгоны үүдэнд харуул манаа гаргаж, аж ахуйн нэгжүүдийнхээ үйл ажиллагааг тас хааж боочихоод, хажуугаас нь чимээгүй хараад суух шиг амархан зүйл үгүй. Гэвч энэ бол гарц шийдэл бус, гал унтраах хэмжээний түр зуурын арга зам юм.
Эрүүл мэндээ бодож байгаа нь энэ гээд сэхээнд дэн дун дэнжигнэж буй эдийн засгаа элгээр нь мөлхүүлэх замыг сонгосоор байвал дахин сэхэл автлаа удна. Ялангуяа манайх шиг өдөр өдрийн орлогоор амьдралаа залгуулдаг, хувиараа хөдөлмөр эрхлэгч, жижиг, дунд бизнесийнхэн нийт аж ахуйн нэгжүүдийнх нь 70 шахам хувийг эзэлдэг улс, хотод ийм бодлого баримтлах нь учир дутагдалтай. Иймд энэ цаг үед иргэд, аж ахуйн нэгжүүдтэйгээ хамт “завиа” сэлүүрдэж, үүрэг хариуцлагыг хамтдаа хэрэгжүүлмээр. Ядаж насанд хүрсэн хоёр сая иргэнээ бүрэн акцинжуулалтад хамруулж дуустал дахиад хатуу хөл хорио тогтоохгүйн тулд шүү дээ.
