Өчигдөр Баянзүрх, Сүхбаатар, Чингэлтэй дүүргийн анхан шатны шүүхэд Хөгжлийн Банкны гүйцэтгэх захирал асан Н.Мөнхбат, Ч.Отгочулуу, Б.Шинэбаатар нарт холбогдох эрүүгийн хэргийн шүүх хуралдаан болов.
Шүүхээс Н.Мөнхбатад дөрөв, Ч.Отгочулуу болон Б.Шинэбаатар нарт тус бүр хоёр жилийн хорих ял оноож шийдвэрлэжээ.
Нийслэлийн прокурорын газраас Монгол Улсын Хөгжлийн банкны захирлаар ажиллаж байсан Н.Мөнхбат, ТУЗ-ийн дарга асан Б.Шинэбаатар нарын эрх мэдэл, албан тушаалын байдлаа урвуулан ашигласан, хууль, дүрэм журам зөрчиж Худалдаа хөгжлийн банкнаас өндөр үнэтэй барилга худалдан авч, давуу байдал олгосон үйлдэлтэй хэрэгт гэм буруутайд тооцож, яллах дүгнэлт үйлдсэн байна.
Тодруулбал, Н.Мөнхбатыг “Монлаа” компанид олгосон зээлд хууль бусаар нөлөөлсөн, Б.Шинэбаатар, Ч.Отгочулуу нарыг Хөгжлийн банк ХХБ-наас оффисийн барилга худалдаж авах ТУЗ-ийн шийдвэрт нөлөөлсөн гэж үзсэн байна.
Сануулахад, “Монлаа” компани нь Хөгжлийн банкнаас авсан зээлээ бүрэн төлж дууссан, харин Хөгжлийн банк нь ХХБ-наас метр квадратыг нь 8,1 сая төгрөгөөр худалдаж авсан оффистоо одоо хүртэл үйл ажиллагаа явуулж байна.
