Нидерландын хааны нэрэмжит “Орчин үеийн уран зургийн шагнал” нь өдгөө 154 дэх удаагаа болох гэж буй, дүрслэх урлагийн хамгийн эртний шагнал аж. Энэ жилийн шалгаруулалтад 379 зураачийн 1000 орчим бүтээл өрсөлдсөнөөс сүүлчийн шатанд 15 уран бүтээлч тодорч үлдсэний дотор монгол зураач Аюурзанын Гэгээ багтсан байна.
Энэ тухай зохиолч, яруу найрагч Г.Аюурзана өөрийн цахим хуудастаа “Амстердам хот дахь Хааны ордонд 2025 оны 2-р сарын 1-нээс 3-р сарыг дуустал дэлгэгдэх шилдэг 15 зураачийн үзэсгэлэнг Виллем-Александер хаан нээж, энэ жилийн ялагчид өөрийн биеэр шагналыг нь гардуулах аж.
Хааны ордонд бүтээлээ дэлгэн үзүүлэхээр шалгарсан 15 нэр дэвшигчийн дунд ганц л ази зураач байгаа нь миний бяцхан охин Гэгээ юм. Охин маань 2024 онд Парис, Лондон хотуудад үзэсгэлэн гаргасныг инстаграмаас нь сонирхож болно” хэмээн хуваалцжээ.
