Сүхбаатарын талбайд авто зогсоол ажиллуулж байсан “UB Construction” ХХК-ийн 2.5 га газар эзэмших эрхийг цуцалж хууль ямар хүчтэйг харуулав. Энэ үйл явдлыг хүмүүс хоёр янзаар хүлээж авах шиг болсон.
Хотын төвийн хөл ихтэй газарт байсан уг авто зогсоол хамгийн хэрэгтэй, хэрэгцээтэй обьект байсан бөгөөд хотын төв хэсгийн авто зогсоолын асуудлын тодорхой хувийг нуруундаа үүрч, замын түгжрэлийг багасгахад эерэг нөлөөтэй байсан гэж үзэж байгаа хүмүүс байгаа юм. Харин нөгөө нэг хэсэг нь “Болж муу сайн юмнууд. Одоо Хүүхдийн парк, Туул голын ай сав, Зайсанд ой мод руу түрж баригдсан барилгуудыг нураах хэрэггэй. Хууль бус баригдсан барилгуудыг нураах цаг нь болсон. Энэ эрчээрээ дайрах ёстой. Хуулиа хэрэгжүүлэхийн төлөө зүтгэе” гэж бусдыг уриалж байна.
Хэдий нийслэлд авто зогсоол шиг эрэлттэй зүйл үгүй ч хотын даргын хийсэн үйлдэл нь хууль ёс хэрэгждэг, хотын удирдлага нь шударга бусын эсрэг тэмцэж чаддагийг бодитоор харуулсан үйл явдал боллоо гэж харж болно. Явган хүний гарцыг чөлөөлөх аяны хүрээнд явган хүний зам, гарцыг хаасан олон барилга байгууламж, өргөтгөл, шат, хашаа хайсыг нурааж чөлөөлж чадсан. Үүний үр дүнд нийслэлчүүд явганаар зорчихдоо саадгүй болж аюулгүй байдал нь тодорхой хэмжээнд хангагдаад буй. Яг үүн шиг зөвшөөрөлгүй барилгуудыг буулгах аяныг эхлүүлэх хэрэгтэй байна. Хуулиа бариад, баримтаа үзүүлээд явахад ялдаг юм аа гэдгийг Сүхбаатарын талбайн урдах 2.5 га газрын зөвшөөрлийг цуцалсан үйл явдал харуулж байна. Одоо Нийслэлийн Засаг дарга авто зогсоолыг буулгаж чадсан шигээ зөвшөөрөлгүй, хууль бус барилгуудыг нурааж газраа чөлөөлж ав.
Хүссэн газартаа барилгын сууриа ухаад барьчихсан байхад нураана гэж юу байх вэ гэж эндүүрч байгаа эрхмүүдэд цохилт өгч аль нэг өндөр барилгыг нь нурааж төр, хууль ямар хүчтэйг харуул. Олон нийтийн зүгээс яаралтай буулгах ёстой гэж үзэж байгаа хэд хэдэн обьектийг ч нэрлээд байгаа юм.
Хүүхдийн парк буюу Соёл, амралтын хүрээлэнгийн газраас хумсалж, луйвардаж авсан “МСS” компанийн эзэмшилд байдаг Шангри-Ла зочид буудлын барилгыг иргэд нэн яаралтай буулгах ёстой гэж үзжээ. Монголын хүүхдуүдийн ирээдүйг уландаа гишгэж, хуулийг завхруулсан энэ хэргийг хэвлэл мэдээллийнхэн удаа дараа олон нийтийн хараанд өртүүлж, дохио өгсөөр байхад хуулийг эс тоон энд барилгаа босгочихсон. Тэгэхээр нийслэлийн удирдлагуудын нураах дараагийн обьект бол яалт ч үгүй Шангри-Ла зочид буудлын барилга мөн. Энэ барилгыг нураасныхаа дараа Зайсанд баригдсан “Зайсан хилл” цогцолборын барилгаас эхлүүлээд хэл ам таталдаг олон байгууламж бий.
Туул голын бургасыг хядаад усны ай савыг бохирдуулж, ундны усны судлыг гэмтээсэн, гэмтээж буй хороолол, хотхон дүүрэн байгаа. Одоо ч барилгын ажил нь үргэлжилж буй хууль бус барилгууд байна. Нэгэн зэрэг бүгдийг нь шуурхай нурааж чадахгүйгээс хойш газрын асуудалтай нэр нь холбогддог нөлөө бүхий хүмүүсийн нэр дээрх барилгуудыг эхний ээлжинд нурааж бусдад нь сануулга өгөх нь зөв алхам.
Үүн дээр ард олон, байгаль хамгаалах болон хүүхдийн эрхийн төлөө зүтгэдэг төрийн бус байгууллагуудын хүчийг нэмбэл зөвшөөрөлгүй барилгуудыг нураах ажил олон нийтийн зүгээс өндөр дэмжлэг авна. Иймийн учир иргэдийн нэрлээд буй нураах ёстой гэж үзэж байгаа хууль барилгуудыг хурааж, газраа чөлөөлөх ажлыг хотын удирдлага анхааралдаа авах цаг нь болжээ. Сүхбаатарын талбайг буулгачихлаа, одоо Хүүхдийн паркийн хашаанд баригдсан Шангри-Ла, Зайсанд баригдсан хууль бус барилгууд, Туулын бургасыг хядсан, хядаж буй хотхон, хорооллуудыг ч буулгана уу.
Д.САРНАЙ
